Бурабай қонақтарын жаңа демалыс бағыттарымен қуанта беруде. Агротуризм саласындағы ең ерекше жобалардың бірі – аймақ тұрғындары мен туристерге есігін айқара ашқан аралар музейі.
Бұл жерде келушілер бал арасымен байланысты ғажайып әлемге қаныға алады: жәндіктердің биологиясы, олардың экожүйедегі рөлі, сондай-ақ ара шаруашылығының тарихы мен дәстүрлері жайлы мәліметтер беріледі. Экспозицияда ғасырлар бойы омарташылар қолданған құрал-жабдықтар қойылған.
Келушілер үшін нағыз бал мен забрусты татып көру, сондай-ақ бал айдау бойынша шеберлік сабағына қатысу – үлкен қызығушылық тудыратын ерекше тәжірибе.
Жоба аймақтың туристік мүмкіндіктерін кеңейтіп қана қоймай, экологиялық мәдениетті насихаттауға және табиғатқа ұқыпты қарауға үлес қосады. Музей Кенесары көшесі, 38 мекенжайындағы Визит-орталықта орналасқан.
Экскурсия бағасы: ересектер үшін – 1200 тг, балалар үшін – 600 тг. Ара балауызынан хош иісті шам жасау бойынша шеберлік сабағымен бірге экскурсия құны: ересектерге – 2500 тг, балаларға – 1800 тг.
