Желтоқсан айында Бурабайда қысқы туристік маусым басталады. Биыл қонақтарды төрт тақырыптық туристік алаң, бүкіл отбасыға арналған демалыс пен ойын-сауық түрлері, мерекелік іс-шаралар және спорттық жарыстар күтеді. Қысқы бағдарлама демалыс күндерін қызықты өткізуге, таза ауада серуендеуге және Қазақстандағы ең танымал туристік бағыттардың бірінде жыл бойы демалудың жаңа мүмкіндіктерін ашуға жол ашады.
Негізгі назар төрт туристік алаңға аударылады: «Бурабай» визит-орталығы, «Ақбура» курорты, «Ақмарал» марал шаруашылығы және Burabayland. Олардың әрқайсысы ортақ бағдарлама аясында жұмыс істеп, келушілерге маусымға сай түрлі демалыс түрлерін ұсынады.
Қысқы ойын-сауықты ұнататындар үшін шанамен және конькимен сырғанау, хаски иттерімен танысу және таза ауада уақыт өткізуге арналған басқа да белсенділіктер қарастырылған. Саяхаттың тағы бір бағыты ретінде «Ақмарал» марал шаруашылығына баруға болады. Мұнда қонақтар маралдарды тамашалап, шаруашылықтың жұмысымен таныса алады.
Мерекелік көңіл күйді жарық инсталляциялары, түрлі-түсті шамдар мен тақырыптық безендіру элементтері қалыптастырады. «Бурабай» визит-орталығының аумағында мәдени-сауықтыру іс-шаралары, интерактивті алаңдар мен мерекелік бағдарламалар ұйымдастырылады. Сонымен қатар мұнда сырғанауға арналған мұз төбешігі мен коньки тебуге арналған мұз айдыны жасақталады. Қысқы кеңістікті мұздан жасалған мүсіндер мен тақырыптық сәндік композициялар толықтырып, демалушыларға серуендеуге және естелік суреттер түсіруге мүмкіндік береді. Бұл орын балалы отбасылар мен қысқы мерекелердің ерекше атмосферасын сезінгісі келетін қонақтардың бас қосатын нүктесіне айналады.
Бағдарламаның маңызды бөлігі спорттық іс-шараларға арналады. Ақпан айында белсенді өмір салтын ұстанатындарды біріктіріп, қысқы спорт түрлеріне деген қызығушылықты арттыруға бағытталған «Burabay Ice» жарысын өткізу жоспарланған.
Бурабайдағы қысқы демалысты курорттық аймақтың қарағайлы орманы мен таулы табиғаты аясында орналасқан «Оқжетпес» емдеу-сауықтыру кешенінде денсаулықты нығайту және күш-қуатты қалпына келтірумен ұштастыруға болады. Келушілерге балшықпен емдеу, емдік ванналар, сутегі ингаляциясы, физиотерапия, озокеритпен емдеу және ультракүлгін сәулемен емдеу сияқты түрлі емдік-сауықтыру процедуралары ұсынылады. Сонымен қатар кешенде арнайы ұсыныс ретінде алты күндік сауықтыру бағдарламасын таңдаған қонақтарға жетінші күн тегін беріледі. Бұл — қысқы табиғат аясында демалып, денсаулыққа көңіл бөліп, күш-қуатты қалпына келтіруге мүмкіндік.
Осылайша, Бурабайға сапарды сан алуан әсерге толтыруға болады: отбасымен уақыт өткізуге, қысқы ойын-сауық түрлерін тамашалауға, туристік нысандарды аралауға демалысты спорттық іс-шараларға қатысумен және кешенді сауықтыру бағдарламасынан өтумен ұштастыруға мүмкіндік бар.
Қысқы маусым — сапарды алдын ала жоспарлап, өзіңізге қолайлы күндерді таңдап, тұратын орынды брондауға жақсы мүмкіндік. Желтоқсан айынан бастап Бурабай қонақтарды қабылдап, қала сыртында демалуға және таныс туристік бағытты жаңа қырынан тануға шақырады.
